Курыд пас 

«Бурджык сьöд нянь сёйны, лун-вой мырсьыны-уджавны, но мед война эз вöв». Тайö кывъяссö Аныбысь ветеран М.Д. Нестеров, кодi Ыджыд война вылӧ ветлысьяс пиысь сиктас колис öтнас нин, шуис миян сёрни помын. А сыкöд аддзысьлыны помканас лоис тöдчанатор: Сталинградса тышлы 60 во тырöмкöд йитöдын вöвлöм воин-десантниклы вичмис нöшта öти награда — казьтылан пас.

Татшöм награда-пасыс ветеранлöн уна. Война дырйи на сетлöмаöсь. Но войнасö казьтылö и курыдджык пас – веськыд киас вöвлöм фронтöвик и öнi на новлöдлö  Сталинградса коссянь 12 осколок.

Фронт вылö Михаил Нестеров веськалiс сэк, кор ветлöдлiс судноöн Печора вывтi капитанлы мöд отсасьысьöн. Веськалiс 25-öд воздушно-десантнöй бригадаö. Дерт, таöдз велöдiсны. Лоис миномётнöй взводса командирöн, веськöдлiс öтпырйö 4 расчётöн. И десантно-штурмöвöй могъяссö кужис жö вöчны, öд парашютöн чеччыштлiс 16-ысь. Налысь бригадасö шыбитлiсны векджык сэтчö, кöнi вöлi медся сьöкыд. А Сталинград дорын сьöкыд вöлi быдлаын. Торйöн ёсь тышъясö коми зон веськавлiс Клецкöй направлениеын, Дон дорын. Танi и ранитчис.

— Ок и яра водзсасис немечыд, — казьтылö салдат, — Сöмын тшын-бус да би. Но вочасöн миян войска ёнмöдчисны: вайисны ён артиллерия, бур зенитнöй установкаяс, истребительяс. Кор öтувтчисны куим фронт, фашистъяс веськалiсны кытшö. Фельдмаршал Паулюс аслас ударнöй частьясса генералъяскöд лэптiсны еджыд флаг.

Ранитчöм бöрын Нестеров бурдöдчис Тамбовса, Ульяновскса, Челябинск обласьтса госпитальясын. А сэсся демобилизуйтiсны. Но вöвлöм воин эз на пöрччы салдат паськöмсö: 3 во вöлi райкомса военнöй юкöнöн веськöдлысьöн. Öнi I группаа инвалид олö пиыскöд. Дерт, висьöдчö нин. Но фронтöвöй збодерлуныс абу на вошöма.

— Служита Сöветскöй Союзлы! – крапкис олöма морт, кор сiйöс награданас чолöмалiс районса военком И.В. Шрамко.

 Парма гор, 2003, Февраль 1 лун.